الإهداءات



إضافة رد
 
أدوات الموضوع انواع عرض الموضوع
قديم 04-13-2013, 09:39 PM   #1
عضو مميز
الشيخ الطيب غير متواجد حالياً
الشيخ الطيب لا يملك نقاط
افتراضي متاسفة/داليا الياس

متااسفة
ماكان اكون مفتونة بيك ماكان اجيك متلهفة
احساسي ليك جاك مندفع بيك منبهر ادمن عيونك والفة
كانت هواجسك ضد هواي متحفظة ومتخوفة
واحلامي بيك كانت سراب كانت طموحةومترفة
متاسفة
علي كل لحظة وكل يوم لازمني طيفك واختفي
علي كل عهد قطعته ليك وانت العهود ما بتعرفها
علي كل موعد بين عيوني وبين بهاك لاصنتة انت ولا اتوفا
متاسفة
اصلا غرامك بي وهم لابيناحب لابينا دم
كان قصدي فيك الخير عشم لكن حنانك ما التزم
اصل الحكاية بريق لمع بين الدياجر واختفي
لاهمستك صبحت عزاي لابسمتك كانت شفا

التعديل الأخير تم بواسطة الشيخ الطيب ; 04-13-2013 الساعة 09:44 PM
رد مع اقتباس
قديم 04-13-2013, 11:37 PM   #2
عضو مميز
ام محمد غير متواجد حالياً
ام محمد لا يملك نقاط
افتراضي


مشكور الخال العزيز على القصيدة الرائعة واسمح لي ان اشارك معك بهذة القصيدة وهي
ايضا للشاعرة داليا الياس تحكي للاسف عن دار المسنين في السجانة



نتح الحنين جواي... طراني حلتنا
زمن الجمال والخير... أيام مسرتنا

... شجر العشر والنيم... المالي سكتنا
صوت الصفق والريح... وأغنام زريبتنا
ضل الضحى الممحوق... وكبابي جبنتنا
الضحكه والترحاب... وبواقي ونستنا
والوقفه جمب الباب... لي ناس معزتنا
عايشين على الموجود... حابين بساطتنا
يوم كنا متكاتفين... و(الجد) منارتنا
والقمره عز الليل... ضوّت رتينتنا
نسمة دعاش الصيف... وريحة زلابيتنا
أمي بتسوي الشاي... و(حبوبه) حجّتنا
وهسع بقت فى الدار... (يا ويح نخوتنا)
وشكرا لأهل الدار... الداروا سوءتنا

(حبوبه) وينك وين؟!...حبوبه والله زمان
كاتلني شوقا ليك... ولي حضنك الدفيان
منك عرفنا دروس... وروينا ريد وحنان
بي توبك المعطون... غطيتي كل بردان
ودعيتي بالتوفيق... وحصنتي بالمنّان
عفوا ملانا غرور... ونسينا كل الكان
لا فهمنا درس البر... لا قيمة الإحسان
وعرفت درب الدار... وضاع مننا العنوان

(حبوبه) زوريني... أنا داير أحجيكي
بي قصة الأحفاد... الخانوا ماضيكي
صغرت مروءتنا... وكبرت مآسيكي
لا سدّ جوعك حن... لا لهفه ترويكي
لاهين ورا الدنيا... ومرات كده نجيكي
لا بنفهم أحزانك... لا بندري بالفيكي
ولو يوم ظلمناكي... عدل الله راجيكي

الغول ختف فاطنه... وما فينا أي حسن
ملينا من عجزك... فتشنا ليكي سكن
وكل ما يطول عمرك...حتشوفي ياما محن
إمكن نزورك يوم... لو مره بس أمكن
لو سنحت الأحوال... ولقينا باقي زمن
بعناكي للمجهول... وقبالها بعنا وطن

الجاب أبوه الدار... ما عنده أي عذر
مهما يكون ظرفه... لو حتى ضاق المر
معقوله يستغنى.. عن والده مرّه بشر؟!
الجابه للدنيا... وعليه ياما صبر؟!
كان راجي يبقى سند... لو شاخ وعدّ عمر
لا راجي جاه لا مال... ولا راجي حتى شكر
داير شوية حب... والذكرى ديما تمر
عن حالنا نحنا زمان... أطفال صغار وشتر
نضحك بدون تكليف... وللهم براه يجر
علشان يعيش مستور... ويلبي كل أمر
والليله جينا خلاص... لي عهده نتنكر؟!
نرميه جوه الدار... والقسوه تتفجر؟!
لا رحمه لا عرفان... لا نخاف ولا نخجل
من ربنا الديان... الوصى يوت بالبر
بالوالد المسكين... العشمه كان أخضر
لكن جفا الحبان... من عشمه كان أكبر
وبقت الحكايه جحود... وإمكن تكون أكتر
منعول ولادة الهم... لي والده ما قدر
والدنيا بكره تدور... وفي الدار دي يتحكر

ضاقت بيوت العز... ووسعت مآوينا
الحزن ماليكم... والزهو مالينا
ما نسيتوا عشرتنا... لكننا نسينا
بارينا درب الغي... وأنكرنا ماضينا
(حبوبه) تاج الراس... نرجوك تسامحينا
وان شا الله داركم يوم... ترحم وتأوينا

دار الحكومه بقت... آخر المطاف بيتكم
فيها بتقيموا الليل... وتصابحوا يوم عيدكم
الدمعه صحبتكم... والخوف أكيد سيدكم
وفي منتدى التغريب... دايما مواعيدكم
ضيعنا أحلامكم... تاجرنا بي ريدكم

(حبوبه) جوّه الدار... محزونه مكلومه
والدار دي في الأحزان... يكمل عديل يومها
تستقبل الأفواج... لا قعده لا قومه
تفتح مع الآذان... قبال تتم نومها
محتاجه رحمه ونور... متجدده همومها
من الفرح والحب... يوماتي محرومه
لازم نساعد الدار... وتعفينا

التعديل الأخير تم بواسطة ام محمد ; 04-13-2013 الساعة 11:39 PM
رد مع اقتباس
قديم 04-14-2013, 12:26 AM   #3
عضو مميز
الشيخ الطيب غير متواجد حالياً
الشيخ الطيب لا يملك نقاط
افتراضي

شكرا الابنه العزيزه ام محمد علي المرور والمشاركه بقصيده لهذه الشاعره العظيمه وواتمني ان لديك المزيد من شعرها
رد مع اقتباس
قديم 04-14-2013, 05:43 PM   #4
مشرف منتدى الصحة والعافية
أزهري يوسف العوض غير متواجد حالياً
أزهري يوسف العوض لا يملك نقاط
افتراضي

فعلا شاعره متميزه , شعر جميل , سهل , معبر , لغه واضحه للفهم .
وفقها الله , وأرجو أن تتحفونا بالمزيد من أشعارها.
رد مع اقتباس
قديم 04-15-2013, 12:14 PM   #5
.: نائب المدير العام :.
 
الصورة الرمزية هاشم عمر
هاشم عمر غير متواجد حالياً
هاشم عمر على طريق التميز
افتراضي

الشاعرة بالجد متميزة ....
أما القصيدة فهى شلالات من الحزن على هذا الوطن ... الذى أصبحت دار المسنين ملاز آمن لكل من تنكرت له الأيام والزمن ... والولد البيسمع حديث زوجته ويتخلى عن أصله وفصله ... وزى ما قال زماااااااااااااان الحردلو ...{ملعون ابوك بلد}
ولمعلومة د. أزهرى ... فإن الكاتبة داليا إلياس لها عمود مقروء بصحيفة الأهرام اليوم بعنوان إندياح ... ولها مقالات جد رائعة ... وسوف أحاول نشر بعضها فى بوست منفصل ...
توقيع : هاشم عمر
أجمل مافي هندسة الحياة ...
أن تبني جسراً من الأمل ...

فوق بحيرة من اليأس !!!

التعديل الأخير تم بواسطة هاشم عمر ; 04-15-2013 الساعة 12:58 PM
رد مع اقتباس
قديم 04-15-2013, 12:22 PM   #6
.: نائب المدير العام :.
 
الصورة الرمزية هاشم عمر
هاشم عمر غير متواجد حالياً
هاشم عمر على طريق التميز
افتراضي

حكاية بيت ...داليا الياس



مُناي في الدنيا سُترة وبيت..
وأصل البيت حنان وأمان.. مودة وريد
محال البيت يكون بس طين.. وزنكي وحيط
ولا ممكن يكون سكر وصلصة وزيت
كلام البيت كلام تاني.. كلام إحساس مقدس وشرع رباني
وريد إنسان عزم وإختار
فتح باب قلبو لمّاني.. بني العش الصغير طمّني آواني
٭ ٭ ٭ ٭
بيوت الدنيا مختلفات وما كل البيوت واحد
في بيت داااافي.. وبيت باااارد
وبيت عمران هوى وتحنان.. وبيت جامد
بيوت مليانة فرحة وحب
وخير وأمان
بيوت عدمانة من الود..
زمن مسكونة بالأحزان
بيوت زااااهية.. وبيوت وااااهية
بيوت تديك سلام وأمان
عشان فيها النفوس صافية.. وفيها التقوى والإيمان
٭ ٭ ٭ ٭
بيوت متروسة مال وإثاث
وخالية من الأمل والناس
بيوت لا لمبة ولا بوتجاز
وناسا لُطاااااف حُنان ولُذاذ
في بيت عاااالي وحوشو كبير
وسيدو وزير خيرو وفير
وليهو غفير .. وبيت من طين
في راكوبتو بس فد زير
ورغم الساكنو زول مسكين
بس حقاني عندو ضمير.. بيوت البهجة عنوانا..
وطول اليوم ضحك وهزار
وبيوت طوالي حرقانة
مولعة زي تقول من نار
بيوت بتراعي حق الجار .. وفيه من الخيار أخيار
بيوت لا بتعرف الجيران..
ولا بتستطلع الأخبار
بيوت تمليك.. بيوت إيجار
وماااابتلقاها بالهين .. ولازم تكرم السمسار
وشوف في سكتك كم بيت .. وفي كل البيوت أسرار
٭ ٭ ٭ ٭
وفي بيت مسكون.. وبيت فاضي ..
وبيت جاحد.. وبيت راضي
وبيت مشكلتو معروفة
ووصلت محكمة وقاضي.. عشان عُشرة سنين هانت
وكل واحد بقى في وادي.. وفي بيت حدادي مدادي
بس مافيهو غير إتنين.. وبيت ملياااان تقول نادي
٭ ٭ ٭ ٭
وفي بيت سكانو متآلفين.. على الحلوة وعلى المُرة
وبيت سكانو مختلفين.. ما بتفقوا بالمرّة
وبيت ستو مرة ضيفان.. مرة سُترة
ما بتستاهل الهجران.. ولا بتستاهل الضرة
بيت ستو دوام.. بتباري في النسوان
لا بتعرف تكرم الضيف.. ولا بتورِّق الخُدرة
٭ ٭ ٭ ٭
وفي بيت محروم من الأطفال
من ضحكة عيون حلوين
وكل يوم ناسو عند دكتوركبير.. أتعابو بالملايين
وبيت أطفالو زي عشرين .. ومحتاجين حق كراسة ما لاقين
وبس عايشين على الله.. ما قادرين يسدوا الدين
وناس تانيين.. مرتاحين.. وهَم في الدنيا ما شايلين
٭ ٭ ٭ ٭
وياما وياما تلقى بيوت .. بيوت صاخبة
وبيوت لا ليها حس ولا صوت .. وكل ناس البيوت بتموت
ويبقى البيت شبر واحد.. وبكرة تكون بيوتنا قبور
لا هم مويه لا هم نور .. ويبقى مُنانا في الجنة
وننسى حكاية السُترة.. وحكاية الريد
كأننا لحظة ما كنا.. ولا فتشنا يوم عن بيت
حليل البيت.. وهم البيت.. وناس البيت
حليل الدنيا بالفيها!! وكل الفيها لا ماليها ولا مكفيها
توقيع : هاشم عمر
أجمل مافي هندسة الحياة ...
أن تبني جسراً من الأمل ...

فوق بحيرة من اليأس !!!

التعديل الأخير تم بواسطة هاشم عمر ; 04-15-2013 الساعة 01:18 PM
رد مع اقتباس
قديم 04-15-2013, 05:31 PM   #7
مشرف منتدى الصحة والعافية
أزهري يوسف العوض غير متواجد حالياً
أزهري يوسف العوض لا يملك نقاط
افتراضي

مشكور ياهاشم على هذا النقل لهذا الكلام الجميل البسيط المعبر.
رد مع اقتباس
قديم 04-22-2013, 10:28 AM   #8
.: نائب المدير العام :.
 
الصورة الرمزية هاشم عمر
هاشم عمر غير متواجد حالياً
هاشم عمر على طريق التميز
افتراضي

حال الدنيا!!!!!


محل ما تقبل ... تلقى الناس
النست العشره وباعت فضلك للنكران
وتلقى الناس التطعن ضهرك
رغم جمايلك فيها زمان
وتلقى الناس التاكل لحمك
وتمضغ سيرتك بالبهتان
وتلقى الناس الخانت عهدك
وفتحت بابك للخذلان
وتلقى الناس القاصده تضرك
.وترمى ملامه على الشيطان
وتلقى الناس التسرق عرقك
وتترك ولدك للحرمان
وتلقى الحاله الصعبه الدايمه
وتعرف إنك فى (السودان)!!!!!

*******
محل ما تقبل .. تلقى الناس الشايفه عيوبك
وناسيه عيوبا وعامله شريفه!!
ناس .. اكاله .. وناس ... نكاره...
وناس محتاله... نفوسا ضعيفه
ناس غداره .... وناس حقاره
وناس فى الغش والله حريفه
ناس قدامك تبسم راضيه
وناس بوراك أعمالا مخيفه
ناس ملياااااانه سواد وقذاره
وعامله نضيفه!!!!
*****
وشوف الناس الديمه تصلى وليها دقون!
شايله مسابح فى إيديها...
وذكر الخالق فى شفتيها...
وبرضو كلامهم ما مضمون!!
تسرق وتنهب .... تضحك وتلعب
....وعاااادى تخون
تكشف سترك .... وتفضح أمرك
وفى كل محفل ليها عيون
عاشقه مناصب الدوله (الضاعت)
وماهماها الناس الجاعت
ما مسئوله عن البكانا
.وهمها أبداً ماهمانا
كأنها يوم ما عايشه معانا..
وعاشقه السلطه عشق مجنون!!
**************
ليهم غره ... وعمّه وشال
وليهم سطوه وعزوه و(آل)
مشغولين بى جمع المال
ما بتفقدوا للأحوال
وفى (القعدات) شيالين حال

****
حتى قرايبك .... خالك .... وعمك
وحتى أخوك من أبوك أو أمك
يقلع حقك غصباً عنك
ويكبر حزنك ويكتر همك
يعمل فيها الأكبر منك
ويعمل فيها الأفهم منك
ويعمل فيها المسوؤل عنك
وساعة الجد .... يتغابى العرفه، وينكر دمك
*******
وما تهتما .... أيوه عشانك ماتهتما
ذيد إصرارك وعلّى الهِمّه
حقق حلمك وأْصَل القمه
وخلى قعاد الناس فى (اللّمه)
يحكى أحاجى مناك التمّه
**********
وبكره أكيييييييد...............
محل ما تقبل ......
تلقى الناس تبسم قدامك
وتحلف إنك عالى مقامك
تكتب فيك أشعار وغناوى
وتنسج ليك (أفلام) وحكاوى
لا تتذكر عنك شينه
لا تهديك أخطاءك وعيبك
كل التعرفو ناس الدنيا عندك
كم يا- سيدى- فى جيبك؟؟!!!!!!!!!
توقيع : هاشم عمر
أجمل مافي هندسة الحياة ...
أن تبني جسراً من الأمل ...

فوق بحيرة من اليأس !!!
رد مع اقتباس
قديم 04-28-2013, 05:09 AM   #9
عضو مميز
الشيخ الطيب غير متواجد حالياً
الشيخ الطيب لا يملك نقاط
افتراضي

والله لخصت بعض الناس وما قصرت ابدا وده فعلا الحاصل (والطاقيه القدرو يلبسا

جزاك الله خيرا ياهاشم وباالله مزيدا من هذه فريدة زمانا
رد مع اقتباس
قديم 02-23-2014, 03:47 PM   #10
.: نائب المدير العام :.
 
الصورة الرمزية هاشم عمر
هاشم عمر غير متواجد حالياً
هاشم عمر على طريق التميز
Oo5o.com (4)

أيوه بغير!!

لـ داليا الياس


أيوه بغير...!!!

وممكن أغلط فى التعبير...

عن مفهوم الشوق واللهفه وعن إحساس جوايا مرير

وإنت بتعرف إنى بحبك...وإنو الريد جوايا مطير

وإنو الدافع كان الغيره...وإنو الوضع الحالى خطير

والمفروض تتوخى الحيطه....وتحمى البينا من التفجير

تسايس نار الظن بالحكمه.....وحسن المعشر.. والتدبير

وماتتعمد تجرح ريدنا...وتنكر كل الود والخير

وين الرحمه الكان بيناتنا ؟....وين المغفره والتقدير؟

وين تصريحك لى بى حبك...وإنو البينا نبيل وكبير؟

وإنك إتعلمتا تسامح...وتفهم إنو الشك شرير

وماتديهو مجال بيناتنا....وأقفل عنو خطوط السير

وخلى طريق إحساسك واحد....وحدد لينا الصدق مصير

وكيف فكرتا تبيع العشره؟....ولسه البينا وديع وصغير؟

مابستحمل نار الفرقه....وظلم الهوى ...وشماة الغير

*وأيوه بغير...

وأنا بتهمك بالتقصير

وحقو تعيد تقدير الموقف.....ويرجع ظلمك لينا حسير

أنا قدمتا فروض الطاعه....ولسع إنتا علينا أمير

ولسع حبك ذاد لى بكره....وريدك فينا مناره ونيل

يغسل عننا ملح الوحده...وليو فى الخاطر موج وهدير

وأيوه بغير

من إنسان ينعم بى قربك

وطول اليوم متحكر جنبك

وحايم بين شريانك وقلبك

وقاطع عننا خبرك ودربك

وخاف يا ظالم يوم من ربك

شاعل فينا مجامر حبك

ومادايرنا ثوانى نغير؟؟!!

*وحقو بدل ماتلوم إحساسنا ولينا تدق كل يوم أجراسك

تفهم إنو أنحنا حبايبك...ونحن قرايبك...وأهلك ...وناسك

ومحتاجين نطمّن أكتر....إننا لسع نور نبراسك

وانك لسع مغرم بينا...ولسه لهيب الشوق أستاذك

وإنو العشره يمين ماهانت.... وبينبض بالإخلاص إحساسك

وإنك فاهم كونها غيره....وتطرد بالغفران وسواسك

وأيوه بغير....من جيرانك....ومن حراسك

*تلويح:
الغيرة ملح الحب...أو مقصلة إعدامه!




توقيع : هاشم عمر
أجمل مافي هندسة الحياة ...
أن تبني جسراً من الأمل ...

فوق بحيرة من اليأس !!!
رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 10:33 PM.


Powered by vBulletin® Copyright ©2000 - 2014, Jelsoft Enterprises Ltd. ,TranZ By Almuhajir